மரத்தடி

சேருமிடம்!

2011-05-23T02:52:00.000-07:00

இறந்ததில்லை!

சேருமிடம் அறிந்ததில்லை!

விட்டோடாத ஆசைகளை
அழித்ததில்லை!

பெற்றதென்ன? இழந்ததென்ன?
எதுவுமே புரியவில்லை!

கட்டில் அடங்கா கனவுகளைக் கொன்று அழித்தும்
அவை சாகவில்லை!

உள்ளம் கொள்ளும் உணர்ச்சிகளின் பிறப்பிடம்
எதுவென்றே தெரியவில்லை!

இந்த நொடி மறைந்து அடுத்த நொடி தோன்றுவதை
கண்களால் கண்டதில்லை!

உறவென்னும் நட்பென்னும், காதலென்னும் கட்டுக்கள்
என் மூளையின் எந்த மடிப்பில் பதிந்துள்ளன?
ஒன்றுமே விளங்கவில்லை!

இல்லாத கடவுள் இல்லாது போன இடத்தில்
என் உலகமும் இல்லாது போயிருந்தால்
இல்லாமை என்னும் வெற்றிடத்தில் அமிழ்ந்து போயிருப்பேனோ
ஆனந்தமாய்..?

தீராக் காதல் கொண்டேனடி...

2011-04-25T11:53:00.000-07:00

காதல் மறந்து, காதல் மறந்து
மீண்டும் மீண்டும் காதல் கொள்வோமடி...
'நாளை' தீர்ந்து போகும் போது - நம்
காதல் தீர்ந்து போகட்டும்...!

காதோரம் ஒரு ரீங்காரம்...

2010-12-12T22:39:00.000-08:00

கொசுவுக்குப் பல் இல்லை என்று தெரிந்தும்
"கொசு கடிச்சிருச்சு! கொசு கடிச்சிருச்சு"
என்று ஊரே கூடிப் பழிசுமத்த,
அது பொறுக்காத கொசுக்கள்
ஊர் முழுக்கப் படை எடுக்க,
நேற்று இரவு
மின்சாரம் புட்டுக்கொள்ள,
காத்தாடி ஓய்ந்து நிற்க,
ஆல் அவுட்டும் தூங்கிப்போக,
நடுநிசியில் மாட்டிக்கொண்டேன்!!!

இடைவிடாது கடித்துக்
காதில் ரீங்காரம் இட்டுக் கொக்கரித்தன
பொல்லாத கொசுக்கள்!

வில்லத்தனமான ரீங்காரத்தை மொழிப்பெயர்த்ததில்...
"நான் கடிக்கிறேனா? நான் கடிக்கிறேனா?
இதுக்குப் பேரு உங்க ஊருல கடிக்கிறதா?
இன்னைக்கு உன்னோட O+ காலிடா..."

நந்தலாலா - அணிந்துரை

2010-11-28T00:14:00.000-08:00

நந்தலாலா ஒரு அருமையான திரைப்படம். கலைஞர்கள் முதலில் தங்கள் படைப்பைக் காசாக்கப் பாடுபடுவார்கள். பிறகு காசுக்காக கலையைப்படைக்கப் பாடுபடுவார்கள். இது கலைஞர்களின் வியாதி. இது தான் கலைப்படம், வர்த்தக ரீதியான படம் எனத் தரம் பிரிக்கச் செய்கிறது. ரசிகர்களின் ரசனையின் தரமும் ஒரு அளவுகோலாக எடுத்துக் கொள்ளவேண்டும். மணிரத்னம் போல், 'நான் எனக்குக் கைவந்த கலையைப் படைப்பேன், ரசிப்பதும் ரசிக்காததும் தனி மனிதனின் விருப்பம்' என்னும் கலைஞர்கள் பொக்கிஷமானவர்கள். அப்படித் துணிச்சலாக எடுக்கப்பட்ட முழு நீளத் திரைப்படம் நந்தலாலா. மிஷ்கின் ஒரு உண்மையான கலைஞன்! தமிழ் இரசிகர்களின் தரம் மிளிர்ந்து இருப்பதால் 'நந்தலாலா' வர்த்தக ரீதியான கலைப்படமாக வெற்றி பெரும்.

நந்தலாலா பார்த்த பொழுது ஒரு அழகான நாவலைப் படித்த அனுபவம் ஏற்பட்டது. திரைவடிவத்தில், குறைவான வசனத்தில், நிறைவான காட்சிகளில் கதை படித்தது அற்புதமான அனுபவம். இளையராஜாவின் இசையோடு கதை படித்தது மனதில் உணர்ச்சிப் பெருக்கெடுக்க வைத்தது. ஜப்பானியத் திரைப்படமான கிகுஜிரோவின் மொழிப்பெயர்ப்பு நந்தலாலா. ஆனால் கிகுஜிரோவிற்கும் நந்தலாலாவிற்கும் திரைக்கதையில் சில குறிப்பிடத் தகுந்த வேறுபாடுகள் உண்டு. குறிப்பாக நந்தலாலாவின் கனமான க்ளைமாக்ஸ்.

காதல், இரத்தம், துரோகம், பாலியல், பிரம்மாண்டம் - இவையெல்லாம் காசு பண்ணும் கலைஞர்கள் கட்டிப் போராடும் கதைக் கருக்கள். காசு கொடுத்துப் படம் பார்க்கும் இரசிகர்களுக்குத்தான் அத்தனை சலிப்பும் ஏமாற்றமும். நந்தலாலா, 'அன்பை' மையமாக வைத்துக் கதை சொல்கிறது. அதுவே உண்மையான இரசிகர்களுக்குத் திருப்தி அளிக்கிறது.

அம்மாவைத் தேடிச் செல்லும் இருவரின் கதை என்பது நந்தலாலாவின் ஒரு வரிச் சுருக்கம். ஒருவன் அன்பால் தேடுகிறான், மற்றொருவன் கோபத்தால் தேடுகிறான் என்பது சுவாரசியம். பயணக் கதைக்குரிய வித்தியாசமான மனிதர்களின் சந்திப்பு, ஓட்டம், சிரிப்பு, அழுகை, பெருமிதம் எனக் கதை நகர்கிறது. தார்ச் சாலையின் வெப்பத்தை நாம் சுவாசிக்க முடிகிறது. ஒளிப்பதிவு பிரமாதம். அன்பின் ஏக்கத்தைக் காட்சிகள் விளக்குகின்றன. தாத்தா பாட்டியின் பராமரிப்பில் இருக்கும் சிறுவன் 'அகி' தன் அம்மாவைத் தேடிப் பயணிக்கிறான், மனநல மருத்துவமனையில்இருந்து வெறுப்புடன் தப்பி சாலையில் பயணிக்கிறான் பாஸ்கர் "uncle". அகி "அன்னவயல்" நோக்கிப் பயணிக்கிறான், பாஸ்கர் "தாய்வாசல்" நோக்கிப் பயணிக்கிறான். அகியும் பாஸ்கரும் ஒரு இக்கட்டான சூழ்நிலையில் சந்திக்கிறார்கள். இருவரும் தங்கள் பணத்தைப் பறிகொடுத்த நிலையில் ஒருவருக்கு ஒருவர் துணை ஆகின்றனர். (இங்கு "uncle" பாஸ்கர் பறிகொடுப்பது சில்லறைகள், சிறுவன் அகி பறிகொடுப்பது சிலநூறு ரூபாய். இரசிக்க வேண்டிய முரண். இது போல் படம் நெடுக இரசனை மிகுந்த காட்சிகள் ஏராளம்). 'ஒருவருக்கு ஒருவர் துணை இங்கு, அன்பு மட்டும் அனாதையா?' என்ற கேள்விக்குப் பதில் பயணத்தில் இவர்கள் சந்திக்கும் மனிதர்களிடம். அங்கங்கு இழையோடும் நகைச்சுவை இரசிகர்களிடம் இருந்து கைதட்டல் சேர்க்கிறது. திரைக்கதை சலிப்பூட்டவில்லை. அம்மாவைத் தேடிச் சென்றவர்கள் இறுதியில் அம்மாவைக் கண்டுபிடிக்கின்றார்கள். அன்பு செலுத்துபவள், அன்புக்காக ஏங்குபவள் அம்மா என்றால், அகிக்கு 'அவள்' தான் அம்மா. தப்பை மன்னித்து ஆதரவு தந்து அரவணைப்பது அம்மா என்றால், அவளுக்கு 'அவன்' அம்மா. அன்பு வாழ்க்கையை அழகாக்குகிறது!

நந்தலாலாவைப் போற்ற வேண்டும். இது போன்ற தரமான முழு நீளத் திரைப்படங்கள் தமிழில் இன்னும் நிறைய எடுக்கப்பட வேண்டும். நம் உண்மையான இரசனையைப் பகிர்ந்து கொள்வோம் நண்பர்களே... :-)

தொடர்பு எல்லைக்கு அப்பால்

2010-08-19T04:17:00.000-07:00

மனம் மகிழ்ந்து உலவும்
தெருவின் வழியே செல்லும்போது
வியந்து வியந்து கேட்டுக்கொள்வதுண்டு -
பட்டாம்பூச்சிகள் ஏன்
செல்போன் பேசிக்கொண்டே
பறப்பதில்லை?

மழை எப்போது அழகாகின்றது?

2010-08-18T03:17:00.000-07:00

மழையில் நடப்பதோர் வரம்!
'மழை எப்போது அழகாகின்றது?' - என்று
மனதோடு அலசிக்கொண்டே நடப்பது அனுபவம்!

மழை அழகு,
நனைந்து சிலிர்த்து நிற்கும்
மரங்களை மீண்டும் மீண்டும்
நனைக்கும் போது!

மழை அழகு,
தேங்கி நிற்கும் நீரில் மிதக்கும்
கத்திக்கப்பலில் துளித்துளியாய் ஏறி
மிதக்கும் போது!

மழை அழகு,
காற்றைக் கொண்டு
என் குடையை விசிறியெறிந்து
என்னை நனைக்கும் போது!

மழை அழகு,
பள்ளிச் சிறுமிகளின்
மழைக்கோட்டில் விழுந்து சறுக்கிச் சென்று
அவர்களின் கை நனைக்கும் போது!

மழை அழகு,
சாலையோர மலர்களின்
நறுமணத்தைக் களவாடி
துளிகளோடு காற்றில் தூவும் போது!

....

புன்னகை மொழி!

2010-08-12T06:01:00.000-07:00

உன் புன்னகைக்கு
என்ன மொழியில்
என்ன அர்த்தமடி?
மழலை மொழியை
மொழிபெயர்ப்போர் யாரும் இல்லாததால்
சற்றே குழம்பிப்போகிறேன்!

நிலவோடு பயணம்

2010-08-12T06:00:00.000-07:00

நின்றால் நிற்கும்
நடந்தால் பின்தொடரும்
நிலவைப் போன்ற
உன் நினைவுகளோடு
பயணிக்கிறேன் கண்ணே,
ஒரு சிறுவனை போல்!

வலி என்னும் சேதி!

2010-08-02T05:35:00.000-07:00

கால்கள் பிடுங்கப்பட்டு,
இரக்கைகள் பிய்க்கப்பட்டு
கொடூரமாய் துடிதுடித்துச்
செத்துப்போன கொசு
சேதி சொல்லாமல் போனதால்,
என்
மூக்கின்மேல் வந்தமர்ந்தது
மற்றொரு கொசு

மழைக்காற்றில் பட்டாம்பூச்சி...

2010-05-19T07:41:00.000-07:00

பட்டாம்பூச்சி தன் சிறகால்
மெலிதாய் என் முகம் அறைந்து சென்றது
மழைக்காற்றில் சிறகடித்து
என் முகம் அறைந்த அவள் துப்பட்டா...

சிந்தும் அன்பு மழை

2010-05-19T07:24:00.000-07:00

நடு இரவைத் தாண்டி வானில் பேய் இடி ...
அய்யோ! அவள் பயந்து போவாளே
என்று பதறிப்போய் அழைத்தேன்
செல்போனில் சிந்தியது அன்பு மழை!

பேரின்பத்தின் ஒரு துளி

2010-04-11T14:06:00.000-07:00

ஆசைகள் அனைத்தும் மறந்து கிடந்தேன்
சில நொடிகள்...

மூடிய விழிகளின் முன்னே
நட்சத்திரங்கள் இல்லாத வானம் விரிந்தது
அதில் துள்ளிக் குதித்து
மண்டியிட்டு
பின் படுத்துக் கொண்டு
அத்தனை வானத்தையும்
இழுத்துப் போர்த்தி
அந்த வெதுவெதுப்பில்
கண் அயர்ந்தேன் சில நொடியில்!

பின் இருளென்னும் சூனியத்தில்
மிதந்திருந்தேன் தனிமையில்!

வீடு தொலைத்த உயிர்

2010-04-11T13:57:00.000-07:00

மனிதப் பிறவியாய்ப் புரண்டு
உழன்று கிடக்கும்
விந்தை ஏன்?
இந்த மாயை ஏன்?

என் மரணத்தின் விடை அறியாமல்
இதே கேள்வியைக் கேட்டுச் சலிக்கிறேன் என்றும்!

அந்தஸ்து

2010-04-11T11:49:00.000-07:00

புவி ஈர்ப்புவிசை மட்டும் இல்லாவிட்டால்
மேல் என்றும்
கீழ் என்றும்
ஏதும் இல்லை!

யோகி aka Tsotsi!!!

2009-11-29T04:17:00.000-08:00

யோகியான Tsotsi யைப் படிக்க இங்கே சுட்டவும் : http://www.tsotsi.com/english/index.php?m1=film

தமிழில் தரமான நல்ல கதைகளுக்குப் பஞ்சமில்லை. அவற்றைத் திறம்படப் படமாக்க தயாரிப்பளர்களுக்கும், இயக்குனர்களுக்கும் தான் பஞ்சம். எல்லாம் வெற்றியின் மேல் இருக்கும் பயம். இங்கே வெற்றி எனப்படுவது முதலீடு செய்த பணத்திற்கு இலாபம் பார்ப்பது அல்லது image எனப்படும் புகழின் மாயப்பிடியைத் தக்க வைத்துக் கொள்வது!!!

இதில் இளிச்சவாயன்கள் யாரென்றால் நம்மைப் போன்ற திரைப்பட இரசிகர்கள்!

பணம் தான் பிரச்னைன்னா தலை சிறந்த இயக்குனர்கள்னு பட்டம் வாங்குனவங்க எல்லாம் கலைக்காக வருஷத்துக்கு நூறு குறும்படங்களையோ குறைந்த Budget படங்களையோ எடுத்து வியாபாரம் பண்ணிப் பாருங்க. வேற்று மொழிப்படங்களோட கதையைத் தழுவி (எங்கள் பார்வையில் 'திருடி') படம் எடுக்கறீங்களே, அதே போல அவங்களோட வியாபார தந்திரத்தையும் (எ.கா., Paranoid Series) தழுவி அல்லது திருடியாவது தரமான திரைப்படங்களைக் கொடுத்து எங்களைத் தமிழ்த் திரைப்பட இரசிகர்களாய் பெருமை படச் செய்யுங்களேன்!

இதுவரை கண்டெடுத்த கண்கள்!

2009-11-29T03:17:00.000-08:00

'கண்கள் இரண்டொழிய வேறில்லை' என நினைத்து
ஏமாந்து இருந்தேன்.

கனவுகள் கொடுத்து
என் மனக்கண்ணைத் திறந்து வைத்தாய்,

அந்தக் கனவுகளை அழிக்கும்
சூத்திரம் கற்றுக் கொடுத்து
அறிவுக்கண்ணையும் திறந்து வைத்தாய்!

இன்னமும் எத்தனை கண்கள் உள்ளதென
ஆச்சர்யப்பட்டு அதிர்ச்சியில் கிடக்கிறேன் நான்!

இன்றும் கழிகிறது

2009-11-29T03:12:00.000-08:00

நேற்றைய நிகழ்வுகளையும்
நாளைய கனவுகளையும்
மன அலமாறியில் இருந்து
எடுத்துப் படித்துக் களைத்துப் போகிறேன்.

மதியவேளைப் பட்டினியில்
புரண்டு படுத்துக் கண்மூடும் போது சொல்லிக்கொள்கிறேன்
'நாளை நலமாய் இருக்கும்' என்று!

WOW!!!

2009-11-19T20:37:00.000-08:00

இந்தத் தொழில்நுட்பத்திற்குப் பெயர் ஆறாம் அறிவு!!! தெளிவாய்ச் சொல்லப் போனால், இது கணினியை நம் உடலில், உயிரில் புகுத்தும் முயற்சி...

மகிழ்ச்சி

2009-11-10T21:58:00.001-08:00

மகிழ்ச்சியைப் பகிர்ந்து கொள்ளுங்கள்,
மகிழ்ச்சி இரட்டிப்பாகும்.
- உன்னோடு சேர்ந்து சிரித்த போது
நான் உலகுக்குச் சொன்னது!

கனவுகளைத் துரத்தியவன்!!!

2009-11-10T00:10:00.000-08:00

இதுவரையில்
என் கனவுகளையெல்லாம்
மலையுச்சிக்கு அழைத்துச்சென்று
கீழே தள்ளிக் கொன்று கொண்டிருந்தேன்!

நேற்று வந்த ஒரு கனவு
தள்ளிவிடும் தருணத்தில் தள்ளி நின்று
என்னை விழவைத்துவிட்டது
பள்ளத்தாக்கினுள்!

இன்னமும் சாகாமல்
மீளாமல்
உயிர்பிழைத்துக் கொண்டிருக்கின்றேன்
என் இன்னபிற கனவுகள் விழுந்து இறந்த
பள்ளத்தில்!

அவள் வரவு

2009-10-07T23:36:00.000-07:00

கருநீல வானில் வெள்ளை நிலா
மேகத்தில் தொங்கிக் கொண்டு
பென்டுலம் போல்
இடமும் வலமும் ஆடிக்கொண்டு இருந்தது...

ஆட்டத்தின் வேகம் பெருகிப்பெருகி
கீழே விழுந்தது!
சூரிய வெளிச்சமாய்
வான வேடிக்கை வெடித்தது
வண்ணவண்ணமாய்!

உறக்கம் கலைந்து
விழித்தெழுந்தேன்,
என்றும் காணக்கிடைக்காத காட்சியாய்
கண்முன் பறந்து சென்றன
ஒரு ஜோடிப் பட்டாம்பூச்சிகள்!

விட்டுப் பிரிந்த கூடு

2009-09-25T07:27:00.000-07:00

நாற்காலி,
காலி பென்ச்,
கோவில் சத்திரம்,
மண்டபத்தின் கட்டாந்தரை,
இரயில் அல்லது பேருந்து இருக்கை,
நடைபாதை,
விடுதி
எந்த இடத்திலும் கிடைக்கும்
தூக்கம்.

குடிக்க ஹார்லிக்ஸா? பாலா?
எனக் கேட்கும்
அம்மாவின் பாசம்
எல்லா இடங்களிலும்
கிடைப்பதில்லை!

நதி ஊறும் நிலவு

2009-09-24T02:13:00.001-07:00

நதியில் மிதக்கும் நிலவு!
என் கைகளில் அள்ளுகின்றேன்,
இப்போது -
என் கைகளில் நிலவு!
வானில் வீசித் தெளிக்கின்றேன்,
இப்போது -
வானில் நிலவு!
குனிந்து நதியைப் பார்க்கிறேன்
மீண்டும்
நதியில் நிலவு!

மழை ஓய்ந்த அகால வேளை

2009-07-31T13:56:00.000-07:00

சிறகு கனத்த பட்டாம்பூச்சிகள்
இலைகளுக்குக் கீழே பதுங்கியிருக்க,
ஈசல்பூச்சிகளுக்குக் கொண்டாட்ட வானம்!!!

பிறவிக்கடன்

2009-07-31T13:46:00.000-07:00

கடைசியாக சைட் அடித்த
பெண்ணின் முகம் மட்டுமே
என் நினைவில் நிற்கின்றது...!

தற்போக்கு

2009-07-18T13:11:00.000-07:00

ஆச்சர்யப்பட்டேன்!
யார் காணாமல் போனாலும்
அறிவிக்கும்
தொலைக்காட்சிப் பெட்டியைக் கண்டு...

பக்கத்துத் தெரு
கோவிந்து மாமா காணாமல் போனபோதுகூட
அறிவித்திற்று!

தெருவே அதை
அரிதாகவும் பரபரப்பாகவும்
பேசிக்கொண்ட போது
அம்மாவிடம் கேட்டேன்,
'காணாம போன என்னோட சிலேட்ட ஏம்மா
காட்டமாட்டேங்குது?'

அம்மா சொன்னாள்,
'மனுசங்க காணாமப் போனா மட்டுந்தான்டா
சொல்லும்'.

ஆர்வம் பொங்கிய
நாள் ஒன்றில்
காணாமல் போனவர்கள் பற்றிய அறிவிப்புக்குச்
சற்று முன்
கட்டிலுக்குக் கீழே ஒளிந்து கொண்டேன்!

கற்பனையில்
கேட்டு ரசித்தேன்,
'காணாமல் போனவர்கள் பற்றிய அறிவிப்பு...
பெயர், கிர்பால்...
வயது, ஆறு...
காணாமல் போன போது
பச்சை நிற சட்டையும்
அரை டிரவுசரும் அணிந்திருந்தான்!'

புன்னகைத்தபடியே
காதைத் தீட்டி வைத்தேன்!

அறிவிப்பும் முடிந்தது
என் பெயரும் அறிவிக்கப்படவில்லை!

வெளியே எழுந்து சென்று
தொலைக்காட்சிப் பெட்டியைக்
கோபமாய் முறைத்துக் கொண்டிருந்தேன்!

எனைக் கண்டு
அம்மா கேட்டாள்,
'இத்தன நேரம் எங்கடா கண்ணு போயிருந்த?'

உள்ளிருந்து விம்மியபடியே
கண்ணீர் விட்டு அழத்தொடங்கியிருந்தேன்!

மென்மையாகிப் போனவர்கள்...

2009-07-08T08:37:00.000-07:00

கடவுளர் காணாமல் போகின்ற
பொன்மாலை வேளை!
ஓர் பட்டாம்பூச்சி வருவதைப் பார்க்காமல்
மலர்ச்சாலை ஒன்றைக் கடக்க முயன்றேன்!

என்னைக் கண்டு திடுக்கென்று திரும்பிய பட்டாம்பூச்சி
ரோஜாப்பூவில் மோதி விழுந்தது!

அச்சத்தில் நின்ற என்னை,
'பார்த்து வரக்கூடாதா? மோதியிருந்தால் என்ன ஆகியிருக்கும் உனக்கு?'
என்றது அன்போடு.

மன்னிப்பு கேட்டு நின்ற என்னிடம்,

(பட்டாம்பூச்சி) 'எங்கே அவசரமாக ஓடிக்கொண்டு இருக்கிறாய்?'
(நான்) 'என் தேவதையைத் தொலைத்து விட்டுத் தேடுகிறேன்'

சற்றே கோபமாகிய பட்டாம்பூச்சி,
'எத்தன பேர்றா இப்படிக் கெளம்பி இருக்கீங்க? வூட்ல சொல்ட்டு வன்டியா?' -
என்று திட்டிக்கொண்டே பறந்துவிட்டது!

தேவதைகள்

2009-07-08T08:14:00.000-07:00

அரிதாய்த் தென்பட்டு
சட்டெனக் காணாமல் போகின்றவர்களே
தேவதைகள்!

சிறு தேவதையின் உலகம்...

2009-06-24T01:43:00.000-07:00

வானம் கொண்ட நீலம் உண்டு
கடல்கள் உமிழ்கின்றன நிறங்கள் என்று
இராமன் அன்று சொன்னான்!

என்றும்
வானம் கொள்ளும் வண்ணங்கள் யாவும்
இரு சின்னக் கைகளின் மந்திரக் கட்டளையாலோ?!

சின்னக் கால்களின் சிறு துள்ளல்கள் கண்டு
மேகக் கூட்டங்கள் கன்னம் சிவப்பதும் உண்டோ?!

உண்மை சொன்னால்...

2009-01-09T02:07:00.000-08:00

நெஞ்சமெல்லாம் காதல்...
தேகமெல்லாம் காமம்...
கொஞ்சம் அருகில் கழிவறை!

நிலவுக்காக

2008-12-31T05:26:00.000-08:00

முழு நிலவு
தேய் பிறை
வளர் பிறை
மீண்டும் முழு நிலவு
அத்தனையும்
நேற்று ஒரே இரவில்,
நீ
உன் போர்வையால்
மறைத்து, விலக்கி
முகம் காட்டியதால்!

காமுகம்

2008-11-04T04:42:00.000-08:00

அன்று,
இரண்டொருவர் மட்டும் நடமாடும் அதிகாலைப் பனிவேளை,
ஓர் புறநகர்ச் சாலை -
அவள் பின்னால் அவன்!

காமத்தின் விசையால்
அவளை மோப்பம் பிடித்துக் கொண்டே
பின்தொடர்கிறான் அவன்!
அவள் பதுங்கிப் போனாலும்
அவன் விடுவதாயில்லை!

'வள்' என்கிறார் போல்
அவள் திரும்பிப் பார்த்தும்
சற்றே நின்று விட்டு
காமத்தின் கோரப்பற்களைக் காட்டுகின்றான்.

அவள் ஓட ஆரம்பிக்கின்றாள்,
அவன் துரத்த ஆரம்பிக்கின்றான்.

கொஞ்சம் தூரம் ஓடிய பின்
அதற்கு மேல் ஓட வழியின்றி நிற்கின்றார்கள்.
முட்டுச் சந்தில் அவளும் அவனும்
சில வீட்டு ஜன்னல்களும்.

மீண்டும் 'வள்' எனும் பார்வை.
ஆனால் இம்முறை,
அவன் மிகவும் தைரியமுடனும்
அனுபவத்துடனும்
பொறுமையுடனும் அவளை நெருங்கி
அவள் காதருகே நாசி வைத்து மோப்பம் பிடித்து
அப்படியே கீழே ஊர்ந்து வால் வரை சென்று..!
அவளால் ஏதும் செய்ய இயலவில்லை.
அதன்பின் அவனால் அவள் இயக்கப்படுகின்றாள், நெடுநேரம்!

ஜன்னலின் வழியே பார்த்துக் கொண்டிருக்கும்
ஒரு சிறுவனின் கண்களை மூடுகின்றாள் அவன் அம்மா

'ஏம்மா கண்ணப் பொத்துற?' என்கின்றவனிடம்,
'இரட்ட நாயப் பாத்தா படிப்பு வராதுடா கண்ணு! உள்ளே போ!' எனப் பிள்ளையைப் பண்படுத்துகின்றவளின் மனதுக்குள்,
'மார்கழி மாசம் வந்தாக்கா இந்த நாய்ங்களால இது ஒரு தொல்ல
இதுங்களப் புடிக்க மறுபடியும் கார்ப்பரேஷன்காரங்க வரக்கூடாதா?'

விலங்குகளை விலங்கினமாகவே வைத்திருக்க உதவுகின்றது காமம்!

தாத்தா

2008-06-27T07:48:00.001-07:00

இனிதாய் முகம் மலர்ந்து சிரிக்கின்றார்.
புளியம்பட்டி போய் வருகிறேன் என்கிறார்.
திருப்பூர் வரை போக வேண்டும் என்கிறார்.
செல்பேசியில் அழைத்தவர் சும்மா கூப்பிட்டேன் என்கிறார்.
நலம் விசாரிக்கிறார்.
வரும் வரை வீட்டைப்பார்த்துக் கொள்ளச் சொன்னவர்
திரும்பாத இடம் சென்றார்.
அவர் சொன்ன செய்திகள் நூறு.

வெண்பாக்கள்

2008-04-11T06:52:00.000-07:00

அப்பன் ஆத்தா சண்டைகள் ஓயவில்லை
பிள்ளை கண்ணீரில் வாடும் - இதுபோல்
வெப்பம் கருக்கும் மலர்கள் உயிர்தின்னும்
நச்சுக் கனிகளாய் மாறும்.

பிழைநீ பிழைநான் மண்மீது நின்றாடும்
பேய்கள் ஆசைகள் ஆகும் - மீண்டும்
பிழையோடு பிழைசேர்ந்து பிழைதான் பிறக்கும்
மனிதனை ஆசையே வெல்லும்.

"என்றும் நம் நினைவில் வாழும் எழுத்தாளர் திரு.சுஜாதா அவர்களுக்கு என் சமர்ப்பணம்"

வினைப்பயன்

2008-03-26T01:35:00.000-07:00

பைக்கில் தன் காதலன் பின்னால்
அமர்ந்து செல்லும் பெண்போல் நாகரிகமாக,
பூங்காவில் தன் காதலனின் கைகோர்த்து
நடந்து செல்லும் பெண்போல் அன்பாக,
கடற்கரையில் தன் காதலனுடன் இணையாக
சிரித்துப் பேசும் பெண்போல் அழகாக,
இன்னும் சில தகுதிகளுடன்
எனக்கும் ஓர் காதலி வேண்டுமென்று
இறைவனிடம் வேண்டினேன்.
என் விருப்பப்படியே அருளினார்.
ஆனால் இப்பொழுது,
என் காதலியுடன் வெளியே செல்லும்போதெல்லாம்
கண்டவனும் அவளைப் பார்க்கிறான்.
என் வேதனையைச்
சென்று முறையிடும் முன்பே
இறைவன் எழுந்து ஓடிவிட்டான்!

மரம்

2008-03-25T07:53:00.000-07:00

சாலையோரத்தில் நிற்கும் மரங்களெல்லாம்
எங்கோ பார்த்ததுபோலவே தோன்றும்.

'அசோகர் சாலையோரங்களில்
மரங்களை நட்டார்'.

தினசரியின் டெண்டர் அறிவிப்பில்
சாலையோர மரங்களை வெட்ட
விடப்பட்ட டெண்டரின் கீழே
நவீன நிழற்குடை அமைக்க டெண்டர்.
தார்ச்சாலை போட டெண்டர் என்றோ விடப்பட்டு விட்டது.

கதாநாயகன், கதாநாயகி மற்றும் குழுவினர்
பனிமழையிலும் பளபளக்கும் வெளிநாட்டுச் சாலைகளிலும்
குதித்துக் குதித்து பாடி ஆடுகிறார்கள்.

கிராமத்துக்கு வரும் நகரத்துப் பறவைகளை
எளிதில் கண்டு பிடித்து விடலாம் -
புளியமரச் சாலையை ஒட்டிச்செல்லும்
மின்கம்பிகளில் அமர்ந்திருக்கும்!

பல நகரத்துப் பள்ளிகளிலும்
குடியிருப்புகளிலும்
மரம் நடுவிழா கொண்டாடப்படுகின்றது.
சத்தமே இல்லாமல்
வயல்நிலங்களெல்லாம்
குறைந்த விலையில்
வீட்டுமனைகள் ஆகிக்கொண்டு இருக்கின்றன.

நான் முதன்முதல் கட்டும் வீட்டின்
முகப்பில் இடம் விட்டு
மரம் நடுவேன்.

பாடத்திட்டம் மாறாமல் இருந்தால்
என் குழந்தைகளும் கற்பர்
'அசோகர் சாலையோரங்களில் மரங்களை நட்டார்'.

மரங்களைப் பற்றி எஸ். இராமகிருஷ்ணனின் சுவாரஸ்யமான கட்டுரை இங்கே...

நிரைநேர் - மனது; நேர்நிரை - காகிதம்

2008-03-19T22:37:00.000-07:00

தென்கிழக்கில் எழும்பி
வடமேற்கில் திரும்பி
கிழக்கு..
வடக்கு..
மேற்கு..
என்றவாறு திசைதோறும் சுற்றித் திரிந்து,
ஓடும் வாகனங்களைப் பின்னால் துரத்தி ஓடி,
அலைந்து, நெளிந்து, சுருண்டு,
காற்றில் மிதந்து,
சாலையில் சீறிவரும்
பேருந்தின் சக்கரங்களின் இடையில் பாய்ந்து,
அடியில் பதுங்கி,
சக்கரத்தில் சிக்கிச் சாகாமல்
பின்வழியே வெளியேறி
செருக்குடன் பறந்து வரும்!
பின்னால் வரும் இருசக்கர வாகனம்
தன் முன்சக்கரத்தில் பிடித்திழுத்து
சாலையின் மேல் சாத்தும்!
சில நொடிகள் திடுக்கிட்டு அசையாதிருந்து
மீண்டும்
தென்கிழக்கில் எழும்பி,
வடமேற்கில் திரும்பி...

நான்.. நீ.. காதல்...

2008-03-19T22:35:00.000-07:00

காதலிக்கும் நோக்கம் இல்லையடி எனக்கு
ஆனால்,
உன்னோடு பேசிக்கொண்டே இருந்தாலோ,
உன் பொன்முகம் பார்த்துக்கொண்டே இருந்தாலோ,
காதலிக்கும் தகுதி பெற்று விட்டவனாய் கர்வம் கொள்கிறேன்.
மாயம் ஏதும் செய்வாயோ நீ?!

தூரங்கள் கடந்தும் அவள் அன்பு!

2008-03-16T20:22:00.000-07:00

மாத வட்டி கட்டியது
அக்காவுக்கு மாப்பிள்ளை பார்ப்பது
அப்பாவின் உடல்நல விசாரிப்பு
என
தொலைபேசியில் எல்லாம் பேசி முடித்தபின்
மறுமுனையில்
என்றும்போல் மறக்காமல் கேட்பாள்,
'சாப்பிட்டியா?'
-அவள் என் அம்மா!

பெண்ணழகு...

2008-03-16T20:14:00.000-07:00

தான் அழகென்ற கர்வத்தால்
தன் கரம்பற்றப்
பேரழகும் பெருங்குணமும் பெற்ற
இளவரசன் வேண்டுமென்பாள்.
அவள் கர்வம்கூட அழகு தான்!

நான் என்றும் நானாக

2008-03-12T22:09:00.000-07:00

வாழ்க்கை,
சில நேரம் இனிக்கின்றது
சில நேரம் கசக்கின்றது
சில நேரங்களில் மகிழ்ச்சியாய்
சில நேரங்களில் துன்பமாய்
இருப்பினும் என்றும் நான்
என் பாதையோரப் பூக்களைக் கண்டு
சின்னஞ்சிறு புன்முறுவல் பூக்கிறேன்!

மின்னும் நட்சத்திரங்களை
விரலால் தொட்டு எண்ணுகிறேன்!

கனவுகளில்
வானிலிருந்து கீழே விழுகிறேன்!

தேவதைகள் துரத்த
ஒளிந்து விளையாடுகிறேன்!

தூக்கிச் செல்வோர் முதுகின்மேல் எட்டிப்பார்க்கும்
பெயர் தெரியாத மழலைகளுக்கு
வாய் சுழித்து கண் சிமிட்டி
தெய்வப்புன்னகை தரிசிக்கிறேன்!

பேருந்தின் ஜன்னல் வழியே
உலகைப் புரட்டிப் படிக்கிறேன்!

இந்த உலகம் எனக்கும் சொந்தம் என்று
என்றும் நான்
நானாக வாழ்கின்றேன்!

சூரியன் நிலவு

2008-03-11T23:51:00.000-07:00

நாம் இருவரும்
அதிசயமாய் பேசி மகிழ்வதைக் கண்டு
சூரியன் கன்னம் சிவந்து
தொடுவானத்தில் மெதுவாய் மறைகிறான்.
மறுபுறம் வெண்ணிலவு நம்மைப் பார்த்து புன்னகைக்கிறாள்!
நாம் பேசிக் கொண்டே இருக்கின்றோம்.

காதல்

2008-02-29T02:16:00.000-08:00

அன்பே,
நீ பேசும் பொருளின்
ஆழம் புரிகின்றது எனக்கு.
ஒரு நிமிடம்,
அடுத்து ஒரு வார்த்தை நீ பேசும் முன்
உன் இதழ் பற்றி முத்தம் வைத்துக் கொள்கிறேன்
பின் உன் பேச்சைத் தொடரு
சலிக்காமல் கேட்கிறேன்.

அறிமுகம்

2008-02-29T00:25:00.000-08:00

நானும்
கணிப்பொறியைத் திறந்து
வலைத்தளங்களுள் நுழைந்து
கண்முன் விரியும் புது உலகினுள் மேய்ந்து
தோன்றும் கருத்துக்கள் கூறி
தூற்றுவாரைத் தூற்றி
போற்றுவாரைப் போற்றி
போனவை வந்தவை என
யாவையும் போல,
உன்னையும் போல
பண்பட்ட மிருகம்!